Актуелности

30
Nov
2020

ПРЕДНОВОГОДИШЕН САЕМ НА КНИГАТА ВО Skopje City Mall

Од утре до петок, ПРЕДНОВОГОДИШЕН САЕМ НА КНИГАТА ВО Skopje City Mall

Повелете на нашиот штанд, каде што ќе можете да ги најдете нашите најнови и најпопуларни изданија по поволни цени. Се гледаме
27
Nov
2020

На денешен ден, пред две години, нè напушти големиот мајстор на македонската драма.

На денешен ден, пред две години, нè напушти големиот мајстор на македонската драма. Но неговите зборови останаа со нас - да нè боцнат или да ни удрат клоца, да ни ја забрзаат циркулацијата ако сме омлитавеле и да ни ја оладат главата ако ни се вжештила, да ни го тргнат пердето од пред очи и да нè натераат - одново и одново - да погледнеме и на лично, и на колективно ниво: до нас, околу нас и најважно - во нас.
Слава му и фала му!
26
Nov
2020

Изневерени очекувањата на издавачите за пролонгирање на роковите за изданијата, Министерството за култура не им излезе во пресрет

„Во година во која сите се соочуваат со потешкотии во работата, очекувано и издавачките куќи, Министерството за култура, иако е свесно за проблемите, одби да излезе во пресрет на дел од издавачките куќи. Издавачите потенцираат дека една од причините за пролонгирање на роковите е и одложениот почеток на работата поради неажурноста и на самото Министерство“, велат во изјава за весникот „ВЕЧЕР“ дел од издавачите"

Дел од издавачките куќи во нашата земја се незадоволни од односот на Министерството за култура кое годинава одби да им излезе во пресрет ним и на авторите и да ги продолжи роковите за реализација на изданија од Годишната програма за дела од национален интерес. „Во година во која сите се соочуваат со потешкотии во работата, очекувано и издавачките куќи, Министерството за култура, иако е свесно за проблемите, одби да излезе во пресрет на дел од издавачките куќи. Издавачите потенцираат дека една од причините за пролонгирање на роковите е и одложениот почеток на работата поради неажурноста и на самото Министерство“, велат во изјава за весникот „ВЕЧЕР“ дел од издавачите.

Тие посочуваат дека иако се обратиле до Министерството за култура за ова прашање, оттаму досега немаат одговор. „Целата ситуација, за жал, се одрази и на динамиката на издавањето на книгите, па така се соочивме со проблемот да не успееме одредени наслови да ги издадеме заклучно со рокот утврден од страна на Министерството за култура, за изданија чие објавување тие делумно го финансираат. Писмено се обративме до Министерството, од името на МАИ (Македонската асоцијација на издавачи н.з.), со барање да се продолжи рокот за доставување на таквите наслови до крајот на годината, како што впрочем дозволува и Законот за култура, но до денес немаме одговор од нивна страна“ изјавуваат од „Полица“.

И издавачката куќа „Три“ со сличен став. „Иако беа образложени причините поради кои ги побаравме одложувањата само на неколку проекти, за рок што инаку законски ни следува, сепак Министерството, кое инаку досега не го проблематизирало продолжувањето на роковите од објективни причини, во кризна година реши да не продолжи ниту еден проект. И сега, неколкумесечниот труд на авторите и преведувачите едноставно паѓа во вода, тие ќе останат без ветениот хонорар за работата, или пак трошокот ќе биде на товар на издавачите, што дополнително го отежнува нивното фунцкионирање во кризна година“, велат од издавачката куќа „Три“.

Со оглед на тешката ситуација во сите сфери на општеството, вклучително и културата, издавачите се повикуваат и на изјавите од Министерството за култура во кои тие се залагаат за поддршка на културата и во вакви тешки околности, особено на изјавата на министерката за култура Ирена Стефоска во неодамнешното интервју во која таа вели дека „има начини и во исклучително тешки состојби да се работи и да се креира, но клучно е да преживееме и да бидеме солидарни“.

Затоа издавачите очекуваат дека Министерството сепак ќе им излезе во пресрет и на тој начин навистина ќе покаже дека се грижи за културата и во овој тежок период.

И издавачката куќа „Или-или“ смета дека Министерството за култура треба да биде флексибилно по ова прашање. „И покрај тоа што ‘Или-или’ успеа да ги реализира сите проекти од областа на издаваштвото до датумот што е предвиден од Министерството, а тоа е 15 ноември, ние стоиме на ставот дека Министерството апсолутно треба да биде флексибилно. Мислиме дури и дека не ние издавачите треба да бараме, туку самото Министерство требаше да иницира да се продолжи рокот за реализација на проектите. Бидејќи знаеме дека се работи за отежнати услови на функционирање оваа година, но и да ги нема, мислиме дека рокот за финиширање на проектите во самите договори треба да се смени во иднина и да биде до крајот на тековната година (31 декември). Ние работиме и на многу други проекти со фондации од Европа и светот и тие самите излегуваат во пресрет и сами ги пролонгираат тие рокови. Ќе повторам, иако ние успеваме да ги реализираме проектите, сметаме дека на сите издавачи кои не успеале треба да им се излезе во пресрет и да се продолжи рокот, а и за во иднина-тој рок треба да се помести до крајот на годината, бидејќи трката со рокот, особено оваа година навистина беше стресна“, посочија за „ВЕЧЕР“ од „Или-или“ додавајќи дека поважно е да се изработи квалитетна книга, отколку во тоа брзање да се направат грешки.

Оттаму додаваат и дека годинава договорите помеѓу издавачите и Министерството биле подоцна потпишани (во мај), односно речиси пет месеци од почеток на годината, со што се скратило и времето за реализација на проектите, односно издавањето на книгите. „Во услови кога многу институции се прилагодуваат кон настанатата ситуација, работат од дома или со скретено време, и кога ќе речиси никогаш не успевате да ги најдете вработените од Министерството за култура на посочените телефони, се очекува од нас да работиме како во нормални услови“, додаваат од „Или-или“.

Од Министерството за култура, пак, нè информираа дека во врска со ова прашање постапуваат согласно договорите потпишани со корисниците на средства по Годишните конкурси за проекти од национален интерес во културата.

„Според договорите потпишани од страна на корисниците на средства за финансирање од областа на литературата и издавачката дејност, корисникот се обврзува проектот да го реализира заклучно со 15.11 2020. Според член 10 од договорите пак, Министерството за култура има право еднострано да го раскине договорот, доколку корисникот не го реализира проектот во утврдениот рок“, беше одговорот на Министерството на нашето прашање дали ќе им излезе во пресрет на издавачите годинава со пролонгирање на роковите.

Наташа Илиевска-Таневски

24
Nov
2020

Марија Митева, писателка: Експериментот е единствен искрен начин да се провериме до каде сме

Со акустичен настап на виолина и виолончело, како и со драмска интерпретација на текстот, кон крајот на летово во Скопје се одржа промоцијата на книгата „Највисокото дно“, дебитантскиот ракопис на авторката Марија Митева, а промотор на книгата беше професорот и поетот Владимир Мартиновски.

Главната тема на „Највисокото дно“ е константното чувство на празнина. Митева вели дека токму од празнината, произлегуваат помалите суб-теми кои се бават со индивидуалните и општествените аномалии како феноменот на телесноста и естетската убавина, идентитетот, современото чувство на отуѓеност, релациите во љубовта, односот родители-деца, живот-смрт, предавство и пријателство, потрагата по слава.

Со Марија Митева поразговаравме за книжевното експериментирање, како македонското издаваштво ги третира младите автори и како тие се трудат да ги промовираат своите дела.

24
Sep
2020

БЕЛА НОЌ И ВО ПОЛИЦА!

Во сабота (26.09.) нашата книжарница ќе биде дел од еден од најубавите ноќни настани во Скопје: „Бела ноќ“. За сите шетачи низ градот и уживачи во уметноста и креативноста, нашата книжарница ќе биде отворена до полноќ, а во неа нашите изданија ќе можете да си ги купите со 30% попуст.
Се гледаме
11
Jul
2020

Петар Андоновски : Лилјана Дирјан – видик во невидено

Петар Андоновски  

 

                               Лилјана Дирјан – видик во невидено*

 

 

Во 2018 –та, неколку месеци по смртта на Лиле кога Милорад Поповиќ, црногорскиот писатеил и издавач со кого таа ме запозна, ми побара да напишам текст за неа тоа беше најмачниот текст во мојот живот. Со денови пишував и бришев за на крајот едвај да успеам да напишам една страна и неколку реда. Текстот излезе во март истата година во списанието Арс кое го издава Поповиќ. Ниту денес, а неверувам дека воопшто некогаш ќе можам да пишувам за Лиле без емоции. Лиле беше и уште е еден од најважните луѓе во мојот живот. Од неа учев за животот, книжевноста, патувањата, готвењата, љубовта... Лиле отпатува во Индија за да го види Саи Баба, јас не морав да идам толку далеку, мојата учителка Лилјана Дирјан беше во Скопје, не морав да одам во никакво Прашанти Нилајам, Лиле беше во Влае на Иван Цанкар.

Лиле прв пат ја видов во дворот на Државната болница, јас во тоа време живеев на Партеније Зографски и на факултетот одев преку болничкиот двор. Во истиот тој двор, во зградата на Онкологија ја видов последен пат. Неколку месеци по првата средба ја имавме првата комуникација во Магор. Мани Готовац (истата Мани од Мокошица на море, Вагон ресторан) во организација на Независни писатели имаше книжевна вечер. Лиле застана пред мене со огромен подавалник и ме понуди со јадење што самата го имаше направено. Но нашето пријателство започна подоцна. А во меѓувреме продолжив да ѝ ги читам книгите. Најчесто ја читав на Крит. Со Лиле ја делевме љубовта кон островите и Медитеранот. Дури едно време и знаев колку пати се споменува сол во нејзините песни (какви чудни опсесии сум имал!).

Со Лиле пријателството ни започна со нејзините колумни Вагон – ресторан кои таа ги пишуваше во Форум. Беше зима, јас бев последна година на студии и заминав за Крит додека да помине најладното. За разлика од Лиле јас не го сакав снегот, дури подоцна благодарение на неа ќе го засакам. И тој јануари ја прочитав последната колумна Довидување. ,,Догледање до следната средба. Ви благодарам на довербата, среќна доколку и вие некого го израдувавтепоканувајќи го во вашиот Вагон рестора. Како што јас ве поведов на моите патувања низ време и вкусови. Ваша Л.Д.” – и нејзиниот меил. Веднаш и пишав.

 

 

Fri, Jan 22, 2010 at 8:39 PM

 

Draga Liljana,

 

Pred malku go iscitav Vaseto Zbogum,upateno nam,Vasite sopatnici,koi so netrpenie go iscekuvavme cetvrtokot (barem onoj cetvrtok vo koj doagase po nas Vasiot voz). Vasiot voz za prv pat kaj mene pristigna na Krit,koga slicajno(iako ne veruvam vo slucajnosti!),eden broj na Forum najdov vo ormanot na tatko mi. Tamu,na Krit,se kaciv vo Vasiot Vagon-restoran i : So zadovolstvo (i maka!)go pravev onoj marmalad od sipinki,go jadev marmaladot od kajsii i suviot kaskaval na Mirjana Bozin,se greev so kibritceto na Devojceto so kibritcinja, se setav po ulicata na divite kosteni....

Iako veke mi nedostigaat Vasite prikazni,kako edinstvena uteha mi ostanuvaat prikaznite koi imav moznost da gi citam recisi cela godina,i koi vlegoa  kako Kuklata od sol vo mojata memorija,rastopuvajci se vo istata za sekogas........

                                                                                                                         So pocit,

                                                                                                                           Vasiot

                                                                                                              Veren sopatnik

 

 

Sat, Jan 23, 2010 at 6:12 PM

 

Drag Petar,

Vie ne znaete kolku ovoj mig me izraduvavte so vaseto pismo.Koga go pisuvav posledniov tekst ne sakav da gi otvoram fajlovite kade se drugite prethodni patuvanja, i recisi i zaboraviv sto se dosega iznapisav.I vie sega me potsetuvate, osobeno sum trognata sto se sekavate na marmaladot na Mirjana i  za Kuklata od sol.Fala vi od se srce.Vo ova vreme na prazno i pogubno politikanstvo, golemiot brat, milioneri koi toa sakaat da bidat a neznaat nisto, sakav da pisuvam za nesta sto me pravele bogata vo sekoja smisla. I na nekoj nacin da gi zadrzam vo memorijata tie iskustva.Sega po reakciite (vcera i denes)cuvstvuvam deka toa bilo dobro.Sum imala cel voz privrzanici. I zatoa sum srekna, dodusa malkucka i  tazna, zatoa  sto toa za nekoe vreme se prekinuva. Za da se utesam , vcera bev vo knizarnica.I vo  kupot knigi  blesna pred ocite naslovot:" Buducnost nostalgije", od Svetlana Bojm (Geopoetika, Belgrad, 2005) i sega uzivam vo ovaa cudesno  obrabotena nostalgija. koja se vika i Petrograd i  Brodski i,Nabokov i tn.

 

Se nadevam dekaVagonot ke go dopisam ,(iako vaka polesno se dopisuvase), i vi vetuvam ,da sme zivi i zdravi , ako vidi bel den, ke vi ja podaramna promocijata. .A bi sakala i nesto vkusno i neobicno da vi zgotvam, ako  moite tendjercinja stanat volshebni , ako mozat da se zgolemat za da ima "za site".

Vi posakuvam mnogu uzivancii, kritovi, gradovi, ljubovi... Imajte dobar vetar za vasiot brod...

Liljana Dirjan

 

Денеска е празник за нашето пријателство. Денеска колумните ,,видоа бел ден”. Денеска излезе од печат Вагон ресторан, Полица, 2020.

Патувај и готви Лиле, каде и да си.

 

*Насловот е од нејзиниот патопис Саи Баба – видик во невидливото, Саѓe врз снегот, Независни писатели на Македонија, 2007

18
Jun
2020

ПОЛИЦА НА ТРКАЛА

ПОЛИЦА НА ТРКАЛА
Во текот на целиот летен период нашата нова книжарница на тркала можете да ја најдете на влезот во Зоолошката градина во Скопје и да се освежите со некоја нова книга .

04
Jun
2020

Интервју со Петар Андоновски: „Мојата награда е награда и за македонската книжевност“

Петар Андоновски, писателот чие име изминатите денови одекнува низ сите медиуми откако ја доби значајната Европска награда за литература, е наш колега во „Полица“. Муабетите поврзани со наградата и со книгите, кои и онака секојдневно си ги правиме со него, решивме да ги споделиме со вас преку едно кратко и слатко интервју.

Што значи за тебе добивањето на Европската награда за литература, а што за македонската книжевност воопшто?

Во Брисел ќе отидам како добитник од Македонија, а тоа значи дека покрај себепромоцијата, ја промовирам и целата наша книжевност. Македонската книжевност е релативно млада и странските читатели речиси не знаат за други наши автори освен за Гоце Смилевски, Лидија Димковска и Румена Бужаровска. Затоа, колку повеќе имаме успеси и признанија надвор, толку повидливa стануваa нашата книжевност. На меѓународните успеси не треба да гледаме како на успех кој се однесува само на авторот, тоа е пред сè успех на сите нас.

 

,

Што е клучното во твојот роман „Страв од варвари“ што мислиш дека е причината за освојувањето на наградата?

„Страв од варвари“ е универзален роман. Не се однесува само на Македонија, туку во него многу лесно можат да се препознаат и читателите во Естонија, во Холандија или во Грција, каде што впрочем и се случува. Романот зборува за стравот од непознатото, за ксенофобијата, за другоста, теми кои за жал се покажаа актуелни и во ова време на КОВИД-19, кога заразените се целосно стигматизирани и на нив гледаме како на варвари кои го загрозуваат нашето постоење.

Кои книги ги извади од твоите полици и ги исчита периодов за време на карантинот?

Реално, периодов читав многу малку и тоа книгата „Вагон – ресторан“ на Лилјана Дирјан, која ја читав во ракопис по не знам кој пат, а која треба наскоро да излезе. Избегнував да читам други книги, затоа што се посветив на пишување на мојот нов роман ,,Неверство”, кој треба да излезе во септември.

 

Успеваш ли нешто да прочиташ додека си на работа?

Мојата работа е таква што можам да си дозволам поголемиот дел од времето да го поминам во читање. Пред да почнам со пишување на мојот роман, ги исчитав: „Крајот на Еди“ и „Историја на насилството“ од Едуар Луј, подготвувајќи се за еден настан кој, за жал, мораше да биде откажан, како и „Моби Дик“ во феноменалниот превод на Огнен Чемерски – сите три изданија на „Полица“. Потоа, исчитав и два романи од Елена Феранте, ,,Денови на напуштеност” и ,,Мрачна ќерка”, и предрасудата дека книгите на Феранте се книги за на плажа целосно ми се урна, а и „Флорида“ од Лорен Гроф ми е едно од поубавите книжевни откритија оваа година, кое исто така успеав да го прочитам на работа.

 

Ти недостасува ли нормалата од пред кризава?

Ми фали гушкањето со луѓето што ги сакам, ми фали времето кога без страв седнував до некој во автобус, ми фали седењето со саати во кафеана, ми фалат промоции на книги, одењето во театар, патувањата...

 

Разговараше: Наташа Атанасова

17
Mar
2020

АКЦИЈА 20% попуст на сите нарачки преку интернет!!! ДОМА СИ - ЧИТАЈ СИ

Додека му пркосиме на коронавирусот седејќи дома, можеме да правиме многу корисни работи меѓу кои и – да читаме!
.
„Полица“ ве поттикнува насловите што сте ги меркале периодов да си ги нарачате од дома – во порака или преку нашата веб-страница www.polica.mk.
.а таа цел, сите наши наслови за нарачки преку интернет се со 20% попуст.

За да го добиете попустот при нарачка од нашата веб продавница внесете „STOP-COVI19“ (без наводници) во полето „Купон за нарачка“ - „Код на купонот“ и кликнете на копчето подолу  - „Внеси во нарачка".

 

Се гледаме и се читаме!